Isa 12 | HUI | STEP | Horo mbira ibulebirago ogoningi Isaraele wali agali tígua iba gana ogodagua loleberemi. Anduane Homogo-o i̱na í̠naga mini yaraga haro. Í̠na i̱hondo keba ho harigoyu ai í̠naga keba ogoni ereba hayagola i̱hondo mana bayale bialu kegome i̱naga miniha dungulo kogoni.

a 12.2Har 15.2, Iba 118.14

b 12.3Yo 4.10, 4.13, 7.37-38

Isaiah 12

Ka̱i̱ lalu iba gana lenego ogo

1 Horo mbira ibulebirago ogoningi Isaraele wali agali tígua iba gana ogodagua loleberemi.

Anduane Homogo-o i̱na í̠naga mini yaraga haro.
Í̠na i̱hondo keba ho harigoyu
ai í̠naga keba ogoni ereba hayagola i̱hondo mana bayale bialu kegome i̱naga miniha dungulo kogoni.
2 Ngode Datagaliwabe ibu i̱ gi mialu i̱naga pele ngiaga kagoni. ^a
I̱na ibuhondo mini mbiraore hongohe wu halu gi nahe holebero.
Anduane Homogo ibuniore kagome i̱ hongoheore heledagonagabi iba ganaru lalu kogonagabi ibu ka.
Ibugua i̱ gi mialu i̱naga pele ngiaga kagoni lalu iba gana lolebero.
3 Iba uli wa wini ngagoha howa iba gagahe noa kagome naragola bayale hagadagua ^b
Anduane Homogo ibugua ibunaga wali agali biamogo bialu pele ngiragola
ibuni karia pole turuore halu poleberemi.

4 Ani pialu howa tígua iba gana ogodagua loleberemi.

Anduane Homogohondo ka̱i̱ lalu biamogo bilonaga mini olalimu.
Ibugua biabe timbuni biyarunaga te wali agali bibahendeore hale helo latagi halimu.
Ibu mini leneore ka, lalu lamilimu.
5 Anduane Homogohondo iba ganaru lalu,
Ibugua biabe bayaleore bigi biyarunaga ibu mini leneore ka, lalimu.
Hameigini tara tara dindi bibahendeha bu karume hale hai helo
bi bayale ogoni lamiai halimu.
6 Isaraele wali agalinaga Ngode Datagaliwabe ibu mini bayale tigabiwi ka.
Ibu ibunaga wali agali ina heba haabo kagoni.
Anigo Hari Saiono wali agaliru-o iba gana bi ladaga halu
Ngode Datagaliwabe mini leneore kago lalu ibunaga mini yaraga hai halimu.